كيف بصمم؟

طريقة التصميم بتختلف من شخص لشخص، و كتير مرات بحب اعرف غيري كيف بيشتغل ليوصل لنتائج النهائية، دايماً بيحكوا شوف مين قدوتك بمجالك او مجال حابب تتعلمه و ادرس حياته. كيف ببلش يومه، كيف بنجز مهماته، كيف بقسم وقته،… الخ هاي الطريقة بتساعدك توصل لنقطة اقرب للطريق يلي انت حابة.

انا ك هدى، تنظيم الوقت مش من نقاط قوتي ولكن حتى الوقت يلي بضيعه ما بكون فعلياً ضايع.

لما يكون عندي مشروع لازم اشتغل عليه، بحب اقرأ عنه، افهم عنه او اسمع من صاحب المشروع اكتر. و بس بترك الموضوع هون و بكمل يومي طبيعي.

خلال الايام يلي بعدها بحب بس اشتغل على التغذية البصرية، اشوف منتاجات قريبة من هاد المنتج، كل ما ازهق بفتح pinterest, behance, facebook, twitter, instagram اي اشي ممكن يلهمني اكتر.

بجمع صور، و مرات جملة، مرات شغلة عالطريق و انا بسوق بصورها، هو وقت انا ما عم بنجز في على الجهاز بس عم بغذي عقلي و بحس كأني عم بهيئه على طريقة تفكير جديدة بتزبط لهاد المشروع.

هاد بالنسبة الى احلى خطوة لما اشتغل على اي مشروع، اعمل moodboard و اتخيل كيف التصميم رح يكون بس بدون ما انفذ اي اشي. كمان في دراسات بتحكي افضل طريقة لتحفظ و تتذكر اشياء جديدة هو عن طريق to sleep on it تشوف اشياء جديدة او يكون عندك افكار جديدة تفكر فيها و تنام. هيك عقلك بربط الاشياء القديمة بالاشياء الجديدة و بخليك تحفظهم اسرع. *هاد مقال كتير ممتع عن المعلومة هاي (https://newsinhealth.nih.gov/2013/04/sleep-it) *

بعد هاي المرحلة بس اقعد عالجهاز و ابدا اشتغل بحس حالي مخلصة نص المشروع براسي و بس ضايل اطبقه. احلل الصورة يلي بعقلي لواقع و فعلياً التصميم ما بياخد معي كتير وقت لاني استثمرت وقت كافي بالبحث و التغذية البصرية.