موجة ريبراندج تجتاح الشركات العالمية!

كتير علامات تجارية معروفة عم تغير شعارها و الهوية البصرية، منهم نوكيا، كيا، ويسترن يونيون و اجدد شركة هي جاكوار لاند روفر.

الاتجاه عم بكون لشعارات ابسط و اسهل، معظمهم من خطوط فقط بدون اي اشكال. مع انه بالأول بتعرضوا للنقد الكبير بأنه الشعار غير مقروء او جداً بعيد عن الشعار القديم.

مثلاً شعار نوكيا

كتير من الناس حكوا انه مقروء ككلمة AOKIA لكن بنظري الشعار صار اقرب للمستهلك، ابسط و كبداية جديدة و واضحة الهم بعد اختفائهم لفترة. و مع الوقت رح يصير مألوف اكتر.

اما بالنسبة لكيا

باعتقادي كيا ما نجحت باختيارها للشعار الجديد، لانه ردة فعل المستهلكين انعسكت سلبياً عليهم. عالم السيارات عالم واسع، و من اكتر الشعارات يلي بنشوفها بحياتنا اليومية. كتير من الناس ما عرفت تقرأ الشعار الجديد، و المعلومة الصادمة انه ٣٠ الف شخص كل شهر بحث على جوجل على سيارة KN باعتقادهم انها سيارة جديدة بالسوق. بالنسبة الي، لو ما انحذف جزء من ال A كانت المشكلة رح تنحل و يكون فعلاً مقروء. و بما انه نحن بعالم السيارات، جاكوار لاند روفر نشرت شعارها الجديد

بالنسبة الي الشعار لطيف و مقروء و لكن هدفهم انه ما يكون على سيارات، هو فقط لاستخدامهم على ويبسايت، صحافة، و لاستخدامات الشركة و بديل لطيف عن الطريقة السابقة و يلي هي شعارين جاكوار و لاند روفر مع بعض. هو شعار حلو و متوازن و نقطة انه لن يتم استخدامه على السيارات رح يقلل نسبة الخلط على انها شركة سيارات جديدة مثل كيا.

موضوع تجديد الهوية البصرية لشركات عالمية ممكن فعلياً يرفع او يقلل من مبيعات الشركة و بنفس الوقت بكلفهم مبالغ هائلة. هو بحمل خطر كتير كبير بس بنفس الوقت هو بترك المستهلك بحالة تشوق ليعرف كيف صارت هاي العلامة التجارية و كيف تغيرت و كيف كانت، الموضوع ابداً ما بوقف على شعار جديد او الوان جديدة. هو خدمات جديدة، انطباع جديد، طريقة التواصل بتختلف، لغة التواصل بتختلف، هو عالم كامل جديد.

لهيك ال rebranding ممكن ينجّح او يهدم أي شركة/مشروع.